Rwanda | ICTR: Kapiteni Nizeyimana yakatiwe igifungo cya burundu
Urugereko rwa mbere rw’iremezo mu rukiko mpanabyaha mpuzamahanga rwashyiriweho u Rwanda (ICTR) rukorera Arusha muri Tanzaniya, kuri uyu wa 19/06/2012 rwakatiye Kapiteni Nizeyimana Ildephonse gufungwa burundu kubera uruhare yagize muri Jenoside yakorewe abatutsi mu rwanda muri Mata 1994.
Kapteni Nizeyimana Ildephonse
Perezida w’itsinda ry’abacamanza baburanishije urwo rubanza Lee Muthoga, yavuze ko urukiko rwasanze Nizeyimana ahamwa n’icyaha cyo kugira uruhare mu iyicwa ry’umwamikazi Rosalie Gicanda itariki 21/06/ 1994.
Si ibyo gusa ariko kuko kuko Ildephonse yanahamwe n’ibyaha bya Jenoside, ubwicanyi no kurimbura imbaga y’abantu, ibyaha byibasira inyoko muntu n’ibyintambara.
Ikindi ni uko yanagize uruhare mu iyicwa ry’umuryango wa Ruhutinyanya n’ibihumbi by’abatutsi baribarahungiye kuri paruwasi ya cyahinda mu cyahoze ari komini Nyakizu.
Uyu musirikari nanone yagize uruhare mu iyicwa ry’umwalimu wa kaminuza nkuru y’u Rwanda Pierre Claver Karenzi waguye kuri bariyeri yari kuri Hotel Faucon i Butare.
Nizeyimana yari umusirikare ufite ipeti rya kapiteni, mu gihe cya genocide akaba yarabaga mu ishuri rya ba sous officiers (ESO) i Butare.
Nizeyimana Ildephonce yafatiwe muri Uganda tariki 5/10/ 2009, agezwa imbere y’urukiko bwa mbere tariki 14/10/ 2009.
