Rwanda : Callixte Nzabonimana yakatiwe igifungo cya burundu kubera uruhare yagize muri Jenoside yo mu 1994
Urukiko mpuzamahanga mpanabyaha rwashyiriweho u Rwanda i Arusha muri Tanzaniya rwakatiye igihano cy’igifungo cya burundu Callixte Nzabonimana kuri uyu wakane tariki 31/05/2012 kubera uruhare yagize muri Jenoside yakorewe Abatutsi mu Rwanda 1994.
Nzabonimana yari minisitiri w’urubyiruko mu Rwanda. Urukiko rwamuhamije ibyaha birimo gucura umugambi wa Jenoside, guhamagarira abaturage gukora Jenoside ndetse n’ibyaha byibasiye inyokomuntu.
Itangazo urwo rukiko rwashyize ahagaragara rivuga ko “inteko y’abacamanza yasanze Nzabonimana yarahamagariye abaturage kwica Abatutsi, ndetse runasanga yaragiye mu nama ebyiri zemeje ko Abatutsi bagomba kwicwa zabereye mu cyahoze ari perefegitura ya Gitarama”.
Tariki 14/04/1994, Nzabonimana ngo yashishikarije abaturage bo mu gasentere ka Cyayi kwica abatutsi bari bahungiye ku cyahoze ari komini Nyabikenke, icyo gihe Abatutsi bari hagati ya 15 na 60 ngo bakaba barishwe. Urukiko kandi ngo rwanasanze Nzabonimana yahamagariye abahutu kwica abatutsi, by’umwihariko ngo akaba yarashishikarije abahutu kwica abatutsi tariki 12/04/1994 i Butare, tariki 18/04/1994 i Murambi kongeraho abiciwe mu gasanteri ka Cyayi tariki 14/04/1994, kandi byose akabikora ku buryo butaziguye.
Nzabonimana yafatiwe mu gihugu cya Tanzaniya tariki 18/02/2008, urubanza rwe rutangira kuburanishwa tariki 09/11/2009. Ubushinjacyaha bwatanze abatangabuhamya 20 muri urwo rubanza, naho uruhande rw’ubwunganizi rutanga abatangabuhamya bagera kuri 40.
Nzabonimana yavutse mu mwaka wa 1953 mu cyahoze ari komini Nyabikenke muri Perefegitura ya Gitarama. Mu gihe cya Jenoside yo muri 1994, yari minisitiri w’urubyiruko, akaba n’umwe mu bantu bakomeye mu ishyaka rya MRND, dore ko yari anarihagarariye mu cyahoze ari perefegitura ya Gitarama.
Urukiko rwamuhamije ibyaha aregwa ruhita runamukatira igihano cy’igifungo cya burundu.
